أخبار عاجلة

عقول سودانية مهاجرة نزيف وطن عيدية بطعم الوجع

Spread the love

مطار أبوظبي واحد من أضخم المشاريع البتتبني حالياً في الشرق الأوسط وأذكاها وحيكون من أجمل التحف الفنية في العالم .. المطار تكلفتو حتي الأن تجاوزت مليارات الدولارات بتكلفة إجمالية بتصل لي اكتر من عشرة مليار دولار .. وحيرفع الطاقة الإستيعابية في مطار أبوظبي لي 50 مليون مسافر سنوياً .. مساحة المبني المركزي بتساوي 21 ملعب كرة قدم .. بي إرتفاع 52 متر عند اعلي نقطة وامتداد 319 متر .. وبرتكز علي أكبر قوس معماري في العالم يعني أعرض مرتين من سقف مطار هيثرو في لندن .. بالتالي حيكون أكبر مبني منفرد علي الإطلاق تم تقيمو عالمياً حسب نظام التقييم اللؤلؤي للمباني .. وبتم حالياً تركيب أحدث التقنيات وأنظمة التحكم لتشغيل المطار .. بدءاً من نظام مناولة الحقائب الحيكون من اكبر واحدث الأنظمة في العالم البسمح بي نقل أكتر من 20 الف حقيبة في الساعه الواااحدة بطول 22 كلم خط سير .. المطار فيهو 156 مكتب وكاونتر إتمام إجراءات سفر .. و48 جهاز لإجراءات الدخول الذاتية .. وبيتم تركيب 145 مصعد و46 ممشى متحرك و 4,300 كاميرات مراقبة .. و 5,000 مواقف سيارات طويلة وقصيرة المدة .. إنشائياً .. المشروع بحتوي علي 69,000 طن من الفولاذ الهيكلي .. 667,300 متر مكعب من الأسمنت المسلح .. 115,000 متر مربع من الزجاج الخارجي فقط .. 275,000 متر مربع من الألمونيوم .. 325,000 متر سراميك وأرضيات حجرية .. وحيحتضن واحد من أضخم أساطيل الطيران في العالم (خطوط الإتحاد) والبوفر ليها 65 بوابة صعود للطائرات من ضمنها بوابات مخصصة لطائرات Airbus A380 أضخم طائرة ركاب في العالم .. المطار بتصل قدرتو الإستيعابية لي 8,500 مسافر في الساعه الوااااحدة .. تنفيذ المشروع ماسكاهو عدة شركات عالمية وهي من أفضل الشركات التصميمية والتنفيذة في العالم شغالة في المشروع علي مدار 24 ساعه بي أيادي عاملة قرابة 30 الف عامل وموظف ومهندس داخل المشروع .. المعلومات الفوق دي بتبدو مجرد حروف وارقام .. بس في الواقع هي أضخم مما الزول يتصور .. وكمية المهندسين المتميزين جداً .. والبمتلكو ثقة في التنفيذ والإشراف بتدهش أي زول جديد في الشغلانية دي .. أيامي الأولي كنت رايح تماماً جوة المشروع .. بس معلومة واحدة غيرت كل شئ في فهمي وثقتي .. كل الحقائق والأرقام الفوق دي .. والتحفة المعمارية والمشروع الخيالي ده .. والشركات العالمية الشغالة فيهو والخواجات والشعر الأشقر وعيون الكدسة .. النافشين ريشهم جوة براحات المشروع .. مدير هذا المشروع هو : “دكتور أحمد عباس” سوداني الهوى والهوية .. زول ولد بلد حد الدهشة .. اول ما عرفت المعلومة دي ياخ بقيت أشهق وأتبسم زي الزول الزايغ بي صرفة صندوق .. وقفت علي حيلي وأديتها نفخة صدرية مستقيمة ونظرات ثاقبة قديت بيها عيون الخواجات نظام طلعتو فارات ساي .. والشغل ده حقنااا يا وهم .. ياخ لمن غيرت مشيتي وأنا بتجول جوة المشروع بي كل عزة وثقة .. وبقيت بدخل معلومة إني سوداني في اي شئ .. واحد يسألني صايم ؟ بقول ليهو أيوة صايم وسوداني بالمناسبة ..

دكتور أحمد عباس حاصل علي البكلاريوس في الهندسه من جامعة الخرطوم و درجة الماجستير في الهندسة المدنية والدكتوراة من جامعه Dundee بالمملكة المتحدة .. أدار ونفذ مجموعة من المشاريع الكبيرة .. كلفتو حكومة الإمارات تكليف مباشر بي إدارة مشروع مطار ابوظبي الجديد .. أضخم مشروع خدمي في إمارة أبوظبي وحيكون من أفضل مطارات العالم .. ورفع تقارير سير العمل مباشرة لي حكومة أبوظبي .. تحت يدو بصرف ملايين الدولارات يومياً .. وإدارة أكتر من 30 الف عامل وموظف داخل المشروع .. أكتر ما يدهش هو صغر سنه مقارنة بي حجم المشروع الماسكو .. والخبرة والعقل الهندسي والإداري البمتلكو والأمانة المطلقة والثقة والمهنية العالية في إدارة المشروع ..

دكتور احمد عباس .. وكل كفاءات بلدي .. المنفيين في بلاد الله الواسعه .. كفاية ياخ .. ارجعوا

نسخة إلي : -الجماعه الطيبين .. -إدارة غرفتين وبرندة مطار الخرطوم

عن sit albanat

د. ست البنات حسن أحمد رئيس مجلس الادارة ورئيس التحرير sitalbanatsudan@gmail.com 201149499580+

شاهد أيضاً

إرتفاع مفاجئ في أسعار خراف الأضاحي

Spread the loveالقاهرة / اخبار وادي النيل ارتفعت أسعار الخراف بالعاصمة الخرطوم بصورة مفاجئة ليصل …

اترك تعليقاً